شوبير: مباراة المقاولون العرب كلها مكاسب للأهلي

و.ش.ع              متابعة _ محمد عبدالظاهر   

 الثلاثاء03 نوفمبر2026   

نشر الاعلامي كابتن شوبير عبر صفحتة علي الفيس بوك عن  مباراة المقاولون العرب والاهلي 

وقال ان مباراة المقاولون العرب كلها مكاسب للأهلي كلها مكاسب للأهلي،

 أولاً محمد هاني سدد وصنع الهدف اللي فاز بيه الأهلي، وعامل مباراة هجومًا ودفاعًا مفيش أحلى من كده، في أفضل حالاته، لاعب تقيل ومهم جدًا جدًا، ومش فارق معاه إذا كان أساسي ولا احتياطي، تحس إنه مركز جدًا.

كمان عودة ياسر إبراهيم، ياسر ثقل كبير جدًا جدًا في النادي الأهلي ومنتخبنا الوطني، فعودته جاءت في التوقيت المناسب قبل مباراتي منتخب مصر أمام مالاوي.

كريم فؤاد لعب في الباك ليفت ودي أحسن مرة أشوفه في المركز ده، دفاع الأهلي كان كويس أوي، بدليل أن حمزة علاء لم يختبر.. أحمد رضا قراراته كانت متضاربة شوية، عايز يبين للناس إنه فايق، ولكن محتاج يهدى شوية، القصة مش محتاجة منه الصعوبة دي، سهلها على نفسك.

طاهر محمد طاهر نجم المباراة الأول بدون جدال ولا خلاف على ده، قدم لقاء جيد، ولعب كرة حلوة أوي لكن للأسف حظه كان سيئ وخبطت في العارضة.

بعتقد الأهلي كان عنده مكاسب بالجملة، مش فكرة إنه فاز على المقاولون، لأ، الأهلي إمبارح راح للمرمى حوالي 7 ولا 8مرات، وكلها محاولات مؤثرة، روح عالية جدًا، الكرة التانية في الشوط التاني معظمها للنادي الأهلي، التحرك بالكرة وبدون كورة، كل دي حاجات كان الأهلي مفتقدها لفترة طويلة.