و.ش.ع القاهرة ۔ محمد مختار
ترامب نفذ التهديد اللي كان بيقوله بقاله كذا يوم ومن حوالي ساعتين كده، الجيش الأمريكي بدأ يضرب بعنف غير مسبوق في قلب البنية التحتية الإيرانية، وتحديدًا الجسور الحيوية اللي هي تعتبر شرايين الحركة والاقتصاد في إيران
الضربات اللي نفذها سلاح الطيران الأمريكي ركزت بشكل أساسي على الجنوب وتحديدًا جسر "كهورستان اللي بيربط بين بندر عباس وشيراز ولار وده للأسف مش مجرد جسر عادي بل هو ممر استراتيجي ممكن ينتج عنه تعطيل أي حركة برية في المنطقة ومجرد قصف مكان زي ده بيعتبره محللين كتير بمثابة إشارة على احتمالية تنفيذ غزو محتمل
بس الموضوع ما وقفش عند الجسور وبس الاستهداف طال كمان محطة قطار ومطار إيرانشهر في سيستان وبلوشستان بجانب 6 انفجارات ضخمة هزت مدينة حميدية في خوزستان والأهواز بحسب الشرق بلومبرج طبعًا كل اللي بيعملوه ده هو محاولة لشل البلد كلها وعزلها جغرافيًا طيب ونتايج الضربات أيه وزارة الطاقة الإيرانية أعلنت رسميًا إن القصف دمر خطوط نقل الكهرباء الرئيسية في مدينة بندر عباس والقرى اللي حواليها، والمنطقة بالكامل حاليًا النور قاطع فيها، لدرجة إن الوزارة نزلت مناشدات عاجلة للمواطنين بترشيد استهلاك الكهرباء عشان يحاولوا يحافظوا على استقرار الشبكة وفوق ده وكالات الأنباء الإيرانية أكدت إصابة سبعة أشخاص على الأقل في ميناء بندر عباس ده غير ان في جسر اسمه نهر شور في كهورستان اتدمر تمامًا واتقفل الطريق في الاتجاهين وفي تقارير اخبارية بتقول إن كان فيه عربيات مدنية معدية لحظة القصف ومحدش يعرف في كام واحد
اتصاب أو مات في الضربة دي
طيب هو الكلام ده معناه إيه بالنسبة لينا في المنطقة العربية ودول الخليج معناه باختصار إننا للأسف داخلين على منعطف خطير جدًا الخبر ده هو أسوأ كابوس ممكن تسمعه عواصم الخليج دلوقتي، لإن الحرس الثوري الإيراني كان واضح جدًا وحذر قبل كده بدل المرة عشرة لو بنيتنا التحتية اتضربت فكل البنى التحتية في المنطقة هتبقى أهداف مشروعة لنا يعني لو إيران شافت إن موانيها ومحطات الطاقة بتاعتها وبنيتها التحتية بتتدمر مش هتردد لحظة إنها ترد في نفس المكان وساعتها مصالح الخليج ومنشآته الحيوية واقتصاده كله هيبقوا في مرمى الصواريخ الإيرانية والمنطقة كلها هتتحول لساحة حرب مفتوحة
وطبعًا كل ده ومذكرناش مضيق باب المندب اللي ممكن جدا يتقفل خلال الساعات اللي جاية وساعتها هتبقى أزمة كبيرة بالنسبة لمصرطبعًا التوقيت مش صدفة دونالد ترامب بقاله أيام عمال يصعد في الهجمات بشكل جنوني وكأنه كان مستني كأس العالم يخلص عشان يفوق للخراب ده ويفضي لخطته
ترامب حاليًا بيحاول يعمل زي الحرب السابقة بالضبط يورط دول الخليج في مواجهة مباشرة مع إيران عشان يشيل الحمل من على كتاف أمريكا واسرائيل ويلبس المنطقة في بعضها وملامح الخطة دي بدأت تظهر لما السعودية قصفت اليمن من يومين، وظاهرة كمان في الضغط المستمر على سوريا عشان تتدخل في معمعة لبنان وتحارب الحزب اللبناني نيابة عن اسرائيل زي ما انت شايف كل الخيوط في النهاية رايحة لخدمة طرف واحد بس الطرف ده هو إسرائيل اللي عايزة تخلص من الضغط عليها وتتفرج على الكل وهو بيضرب في بعضه وبيحرق في بعضه وهي قاعدة في الأمان بتنفذ خطة اسرائيل الكبرى ربنا يسترها على أهالينا في الخليج وفي كل الدول العربية لإن الساعات الجاية دي ممكن تشهد تطورات تقلب موازين المنطقة كلها وتدخلنا في نفق مظلم
اترك تعليقاً
لن يتم نشر عنوان بريدك الإلكتروني. الحقول المطلوبة مشار إليها بـ *